山百合：《復活的人》讀後感／鄭良光(2015-06-04)
《復活的人》讀後感 鄭良光
 佇為TUF「台灣人聯合基金會」籌辦「台灣作家演講系列」的過程，互我有機會接觸著太陽花世代的青年作家胡長松及伊的新作台語長篇小說「復活的人」。
平時罕得讀小說的我，竟然佇短短的時間，給胡長松五百外頁的台語長篇小說「復活的人」讀完。深澀的台語漢字並無妨礙讀故事的趣味，顛倒是故事內面豐富的台語語詞，互讀這本小說的過程加添一寡找寶心適的滋味。小說內面野百合學運時代的愛情故事，及西拉雅原鄉風景的美麗，到今猶留佇心內。
網路資訊爆炸的世界已經造成我kan-na只讀標題無讀細節的歹習慣,用腦，無用心咧讀，欲用上緊的速度吸收上濟的資訊，讀冊成做是工作毋是享受。「閣活的人」這本冊[chhoā] 我慢慢去體會「離鄉」的人心內現實及理想，堅持及妥協的爭札。我慢慢仔去想像離鄉的人回鄉的快樂，欣賞原鄉的美麗。
故事的男主角葉國典出世佇台灣南部「番仔厝」偏僻的庄腳。細漢的遭遇及大中國教育的洗腦，互伊看輕家己西拉雅的出身，拍拚追求天龍國優雅的物質生活。可惜，T大的學位，及伊用心設計追求著的外省權貴背景的某，嘛無法度改變伊的社會地位。伊頭殼額頂烏金龜的胎記，就親像伊無愛人知的西拉雅族群陰影，互伊真大的困擾。失去原鄉的認同，葉國典看輕家己，嘛互怹某的後頭厝看無。伊著愛學習委屈家己，來維持伊的婚姻。伊牽涉著一件受陷害的貪污案，伊的丈人為著顧面子，竟然迫伊認罪協商免得給代誌舞大。伊決定無欲閣繼續忍受，就製造車禍假死，裝做一個失去記智的游民，漫無目的流浪對南部去。佇無意抑是天意的中間，伊讀著T大學弟江文達生前寫互野百合學運學妹李春岫的情批，內面男女的情愛,疼惜，對西拉雅文化美麗的願景及理想濫濫做伙，煞給愛文學的葉國典迷去，栽落去西拉雅文化內面，走找[chhoē]江文達的死因及李春岫的下落。這個過程「翻轉」葉國典的自我認同，得著新生命，成做一的「復活的人」。
情批主角江文達的出身背景年紀及葉國典真相像，頭殼額仔嘛有一個烏金龜胎記。雖然江文達嘛是西拉雅後代，毋過伊有健康正確的自我認同，並無葉國典彼款追求上流物質社會的生活的心態。江文達自佇T大學生時代就參與野百合學生運動。學運中愛著學妹李春岫。後來回鄉，佇一場環保護鄉運動互烏道暗殺。伊的死親像「一粒麥仔，落土，死，就結實濟濟」。西拉雅族人佇一波一波的環保護鄉的抗爭中，漸漸找著族群的認同及自信。
故事的女主角李春岫出身佇西拉雅部落「七層嶺教會」家庭，是江文達T大的學妹，讀新聞系，學生時代是一位早熟，自信，美麗大方的現代女性。佇江文達熟悉以前，伊及伊的教授，一個自稱是自由主義學者的S教授，有一段曖昧的感情。教會的背景互伊對族群及土地有積極樂觀的認同。畢業後佇七層領教會擔任幹事，閣成立「百合之家」中途之家，協助受難的婦女行出陰影。
S教授是二二八受難家屬，伊的家族為著經濟利益加入國民黨，留美的期間參加K黨外圍組織學生聯誼會，猶未提著學位， T大的教授職位就等伊轉去做。佇學術理想及家族利益的中間，伊成做世界公民的自由主義學者 ，受著天真單純的學生真大的歡迎。
「復活的人」故事的主角葉國典，佇台灣文化的面向，代表自我認同錯誤的台灣人，經歷「故鄉」「離鄉」「回鄉」三個階段，回轉去到自我出身的文化圈，找著真實的自我。故鄉是爸母是土地田園。殖民地的社會政治經濟結構互台灣人佇求生存，追求較「優雅」的物質生活的過程中，不得不壓制自我，掩崁家己的「故鄉」，倚靠異質的殖民文化的遊戲規則來委屈求榮。這就是心靈的「離鄉」。毋過，「故鄉」是親情，是切袂斷的文化牽連。「離鄉」是無奈，著愛「回鄉」才會找[chhoē]著家己的自由及幸福，造就有主體性的台灣文化。
佇基督教信仰的面向，故事內面「故鄉」象徵上帝的創造，每一個人的生命，每一個族群文化，攏是上帝「看做好」尊貴的存在。葉國典「離鄉」象徵伊不滿上帝給伊生做西拉雅人，這種不滿互伊無接受家己，活佇烏暗中，造成伊不幸的人生。認識李春岫以後，藉著基督教的信仰，「回鄉」接受西拉雅人的出身，接受上帝佇伊身上所創造的全部,找著生命的意義，認同家己族群的文化，進一步幫助佇殖民體制內面受著壓制的族人，伊對一個巴結外來權勢追求物質生活的人，「翻轉」做一個認同本土關懷弱勢的人。用基督教的宗教語言來講，葉國典得著重頭生，成做一個「復活的人」 。
面對外來強勢文化抑是大自然生存威脅的挑戰，部落文化「離鄉」是必然的現象。相對佇葉國典離鄉的心態，江文達的「離鄉」毋是出自不滿,是為著使命,是欲去外面的世界吸收新智識，找資源來幫助故鄉。 西拉雅神話內面嘛有類似的離鄉故事。勇敢的臘人Rikwa受託，為族人找新天地，來逃閃飢荒,伊離鄉出海，到一個女人島，娶著上水的查某Uma，溫柔鄉的生活互伊袂記得離鄉的使命。幾冬後佇春天的雨裡，伊想起故鄉的託付，感覺見笑閣想厝，坐佇珊瑚礁石頂懸留目屎， 伊的牽手Uma鼓勵伊回鄉完成使命，拜托伊的囡仔伴，一隻大海翁，給怹載轉去，佇海上抵著大風颱，烏雲裡出現阿立祖的聲：「Uma 及伊的囝是受我祝福的，西拉雅嘛受我祝福，怹的囝孫會親像海沙遐濟。。」
「復活的人」是一本新一代台灣人追求平埔族自我認同關懷弱勢的故事。
作者胡長松接受「台灣人聯合基金會」Abt:_文化沙龍「台灣作家演講系列」的邀請，6/20 下晡一點半欲佇台灣會館演講「復活的人」創作的過程及感想。(作者為「台灣人聯合基金會」(TUF) 前會長)
|