《全民台語聖經》出版 5月24日感恩禮拜／林俊育(2015-06-04)
《全民台語聖經》出版 5月24日感恩禮拜 圖／文 林俊育 (台北)
全民台語聖經協會（Common Taiwanese Bible Association）5月24日ti台北市雙連教會舉行《全民台語聖經》出版感恩禮拜，有出版「台灣基督長老教會設教150週年記念版」ê《新約附詩篇、箴言》漢羅版kah 白話字版。
由梁維真牧師司會，蕭清芬牧師主理，蕭牧師ê信息是《恩典奧妙ê五旬節》，五旬節成做全民台語聖經協會ê誕生日，ti 台灣基督長老教會設教150 週年出版三種版本ê《全民台語聖經》獻ho͘ 上帝，意義非常，歸榮光ho͘至高上主。
讀經（詩篇104:24-34；使徒行傳2:1-4）由前雙連視障關懷基金會董事長楊錦鐘執事用點字版來讀，由西羅亞（盲人）合唱團獻詩，有點字ê程序單ho͘ in thang用。《全民台語聖經》koh 同時上網思羅安信望愛網站（台語點字http://sloan.fhl.net ），協會ê「全民」包括盲朋友。
會中特別頒「榮譽理事長」證書ho͘ 出錢、出力koh 出智慧ê 賴永祥長老。
賴長老93 歲高齡，無方便坐長途飛機回台，由協會秘書長林俊育長老代領，帶回波士頓ho͘賴長老。
會中有賴永祥長老ê視訊致詞，伊講：「....全民台語聖經協會出版《全民台語聖經》了後，計畫koh 出版《全民客語語聖經》kah《全民原住民語聖經》。....」
會中有客語聖經翻譯委員會主委彭德貴牧師kah 政治大學原住民族研究中心主任 林修澈（theh）教授ê致詞lóng有肯定協會ê宗旨：「研究kah 出版有主體性koh 人人讀有ê台灣母語聖經譯本」。
賴永祥長老致詞koh 講：「....全民台語聖經協會tú 開始，請大家來參與chit-ê有意義ê事工，ho͘ 《全民台語聖經》成做「全民」讀有koh 愛讀ê聖經。....」
《全民台語聖經》是以《巴克禮白話字聖經》做基礎，ka原本ê廈門話改做現今台灣ê普遍腔台語（以高雄市為主ê中南部腔。協會ê網站 http://ctb.fhl.net。
|